Liwat naman nga madugangan ang kabudlayan sang mga motorista matapos nga nagpatuman naman ang mga oil firms sang oil price hike subong nga semana.
Nagmarka ini sang ikaduha nga asod-asod nga semana nga pagsaka sang presyo sang produktong petrolyo.
Sa separado nga advisories, ang Chevron Philippines Inc. (Caltex), Flying V, Petron Corp., Seaoil Philippines Corp. kag Shell Pilipinas Corp. ang magapatuman sang pagsaka nga P0.70 sa kada litro sang gasolina, P0.40 sa kada litro sang diesel kag P0.20 sa kada litro sang Kerosene.
Ang Cleanfuel, Petro Gazz, kag PTT Philippines Corp. ang magapatuman sang pareho nga price adjustments magluwas sa kersone nga wala sa ila nga produkto.
Ang price adjustments ang nagtake effect alas-6:00 ang takna sang aga Pebrero 25 para sa tanan nga firms magluwas nalang sa Cleanfuel nga magapatuman sang price adjustment alas-4:01 ang takna karun sa hapon.
Una na nga ginpahayag sang Department of Energy-Oil Industry Management Bureau (DOE-OIMB) nga may mixed adjustment sa retail prices sang petroleum products subong nga semana bangud sang supply disruption, ang pagsaka sang oil price cap sa Russia, kag posible nga delay sa output hikes sa Abril.
