Madugangan naman ang kabudlayan sang mga motorista matapos nga nagpatuman naman sang bigtime price hike kun sa diin ini na ang ikaapat nga semana nga nagpatuman sang price hike para sa diesel kag ikatatlo nga semana para sa kerosene.
Sa separado nga advisories, ang Chevron Philippines Inc. (Caltex), Seaoil Philippines Corp. kag Shell Pilipinas Corp. ang nagpatuman sang pagsaka nga P2.65 sa kada litro sang gasoline; P2.70 sa kada litro sang diesel kag P2.60 sa kada litro sang kerosene.
Ang Cleanfuel ang nagpatuman sang pareho nga price adjustment magluwas nalang sa kerosene nga wala sa ila nga produkto.
Nagtake effect ang price adjustment alas 6:00 ang takna kaina sang aga sa tanan nga oil firms magluwas nalang sa Cleanfuel nga magapatuman sang price increase alas 4:01 ang takna karun sa hapon.
Suno sa Department of Energy, ang pagsaka sa presyo sang gatong ang bangud sa tension sa Middle East.
Sang tinalikdan nga semana ang mga oil firms ang nagpatuman man sang pagsaka nga P1.20 sa kada litro sang diesel kag P0.70 sa kada kerosene samtang wala sang pagbag-o sa presyo sang gasoline.
Humalin sang Enero subong nga tuig, ang net increase sa gasolina ang nagdangat sa P6.05 kada litro kag P4.05 sa kada litro sang diesel, kag net decrease nga P5.35 sa kada litro sang kerosene as of October 8, 2024.
