Nagsaka ang presyo sang harina nga ginabaligya sa mga merkado sa Bacolod kadungan sang pagmahal sang presyo sang gatong kag iban pa nga imported raw materials.
Sa interview sang Bombo Radyo kay Ziel Gato, cashier sang wholesaler sang harina sa Libertad Public Market, P930 lang ang presyo sang kada sako sang harina sang bulan sang Mayo apang nagsaka ini sa P960 sang tinalikan nga bulan kag wala na sang pagbag-o tubtub subong.
Aminado si Gato nga may iban nga manugbakal nga nagaisol sang ila nahibaluan ang presyo apang liwat man sila nga nagabalik agud nga magbakal bangud palareho ang presyo.
Suno sa cashier, nakibot ang mga kustomer sa pagsaka sang presyo.
Kalabanan sang ila mga kustomer ang suki na apang may walk in man.
Suno kay Gato, first class wheat flour ang ginagamit sa paghimo sang tinapay samtang 3rd class naman ang para sa apa.
Kalabanan naman nga nagabakal ang nagapanag-iya sang panaderia kun sa diin indi magnubo sa lima ka sako ang ila ginakumpra.
Sang weekend, ginpahayag sang Philippine Bakers Association nga nagahingyo sila sa gobyerno nga hatagan sila sang ligwa nga makapasaka sang presyo sang pandesal sa kwatro pesos kada isa samtang ang jumbo pandesal naman ang ipasaka sa P8 kada isa.
