May yara sang saka sa presyo sang imported nga bugas subong nga bulan sang Agosto.
Sa interview sang Bombo Radyo kay Rene Albancis, staff sang missyon barato rice retailer sa Silay City Public Market, ang pinakamataas nga presyo sang local rice per kilo yara sa P47 samtang ang pinakamanubo naman yara sa P37.
Sa imported rice naman ang pinakamataas nga presyo per kilo yara sa P44 samtang ang pinakamanubo naman yara sa P38 per kilo.
Suno diri, sa kada sako sang imported nga bugas may yara sang P50 tubtob P100 nga saka amo nga kun magbaligya sila nagapatong man sila sa presyo agud makaginansya.
Samtang, nagpahayag naman ang iban nga rice seller nga may yara sila sang kapierdehan bangod nagnubo ang presyo sang bugas samtang nakasanto ang ial presyo kun pila ang ginabaligya sa ila sang supplier.
Suno kay Lila Gaspar, tag-iya sang grocery store sa Silay City Public Market, nakaligad nga bulan nakabakal na ini sang pila ka sako sang bugas apang subong nga Agosto nagnubo ang presyo sang baligya-anay amo man nga ginpanubo-an nila ang presyo sang ila baligya.
Suno diri, maayo na ang lakat sang baklanay apang wala sila nakabawi sa ila nagasto sang tinalikdan.
Sa ila baligya, yara sa P38 per kilo ang pinakanubo nga presyo samtang ang pinakamataas naman ang yara sa P50 per kilo sa local rice.
