BACOLOD CITY — Wala sang pagbag-o sa presyo sang itlog kag karne sang manok nga ginabaligya sa tatlo ka mga merkado sa ciudad sang Bacolod sa tunga sang bird flu outbreak sa Pampanga.
Sa pagsikyar sang Bombo Radyo, ang extra large nga itlog ang nagabili sang P7 tubtub P7.50; ang medium-sized ang sarang nga mabakal sang P6 tubtub P6.50; samtang P5 naman ang ginatawag nga bulilit ukon ang pinakagamay nga itlog.
Suno sa isa ka retailer sang itlog, wala sang epekto sa supply sang itlog sa Bacolod ang shipment ban nga ginpatuman sa Luzon bangud ang ginabaligya diri sa ciudad ang halin sa Bantayan, Cebu kag sa isa ka farm sa Barangay Mansilingan.
Samtang, ang presyo sang karne sang manok naman ang 130 tubtub 135 pesos kada kilo.
Suno sa isa ka manugbaligya sang manok sa isa ka merkado sa ciudad, normal ang supply nga nagaabot sa Negros Occidental apang indi maayo ang ila sales bangud maiwat ang baklanay.
Suno sa retailer nga naghingyo nga indi paghingadlan, ang maiwat nga baklanay ang indi bangud sa bird flu kundi bangud sa lean months.
