Aminado ang provincial veterinarian sang Negros Occidental nga may posibilidad nga magsaka ang presyo sang itlog sang manok sa masunod nga sinemana apang indi ini magdangat sa P15.
Sa interview sang Bombo Radyo kay Dr. Placida Lemana, nagmahal ang production cost kaangay sang feeds kag bulong.
Bangud sini, may tendency nga magdangat sa P10 ang isa ka itlog apang malayo nga maglapaw ini sa P15.
Naistorya ni Lemana ang grupo sang major players sa industriya sa Negros Occidental kag nagpatunda na ang mga ini nga pasakaan ang presyo.
Magluwas nga magmahal ang production cost, mahal man ang transport cost bangud padayon ang pagsaka sang produktong petrolyo.
Nahibaluan nga ang layers ang nagasalig sa laying mash bangud wala sila ginakupahan sang sulog gani kinahanglan nila sang bastante nga pagkaon ukon feeds.
Apang suno kay Lemana, indi dapat nga magkahangawa ang mga Negrense bangud may bastante nga supply sang itlog sa Negros Occidental.
Ang layers ang nagapangitlog sa edad nga lima ka bulan apang indi man tanan ang nagapangitlog sa kabug-usan nga ginabreed kag sila ang apektado man sang pila ka factors kaangay sang pagkambyo sang klima.
