May dako na nga pagnubo sa presyo sang kalamay sa Burgos Public Market.
Sa interview sang Bombo Radyo Bacolod sa vendor nga si Ma. Fe Paris, gikan sa anay P80 nga presyo sang wash sugar, nagpanaog na ang presyo sa P64, kasubong man ang brown sugar.
Ang refined sugar nga anay P90 ang nagpanaog naman sa P80 samtang ang muscovado ang nagapabilin sa P90.
Suno kay Paris, madamo sa gihapon ang nagabakal sang kalamay partikular na subong nga Christmas season, kun sa diin sila ang makapaubos sang tatlo tubtob lima ka sako sa kada adlaw.
Ang supply nga ila ginabaligya ang ginadeliver naman gikan mismo a Victorias Milling Company (VMC).
Nahibaluan nga ginalauman gid man ang pagnubo sa presyo sang kalamay sa merkado matapos nga magnubo ang millgate price sa P45.
Nagalaom naman si Paris nga ang presyo ang maganubo pa tubtob P50 kaangay sang pre-pandemic period.
Ginatsekyar naman sang Department of Trade and Industry ang mga merkado agud maseguro nga wala sang overpricing kag madasig man nga nagasunod ang mga vendors.
