Pabor ang nagabaligya sang kalamay sa Libertad Public Market nga tsekyaron sang gobyerno ang mga bodega sang mga traders agud mahibaluan kun may yara pa sang stock ukon manug-ubos na gani tuman kadako ang ginsaka sang presyo halin sang nagligad nga bulan.
Sa interview sang Bombo Radyo kay Jimmy Soqueña, wala sang pagbag-o sa presyo sang kalamay halin sang Miyerkules tubtub subong nga adlaw.
Ang refined sugar ang nagabili sang P98 kada kilo, P70 ang raw sugar samtang P70 naman ang brown sugar.
Sang nagligad nga duha ka semana, P60 ang bili sang raw sugar tubtub nga nagsaka sa P68 kag nangin P70.
Ang brown sugar naman nga P48 ang normal nga presyo ang nagsaka sa P55 tubtub P60 kag nagabili na sa karon sang P70.
Sa karon, ara na sa traders ang stocks sang kalamay bangud pila na ka bulan humalin sang natapos ang galing.
Nagapati si Soqueña nga wala sang kakulang sang supply bangud may ginadeliver man ang trader kun sila ang mag-order kag wala man sila ginalimitahan sa kadamuon sang order.
Suno sa retailer, ginabuhinan lang nila ang sinako nga ginabakal bangud nagagamay man ang ginabakal sang tawo.
Sang tinalikdan nga tuig, malapit P2,000 ang sako sang refined sugar apang sa karon, nagabili na ini sang malapit P4,600.
Suno diri, mas maayo gid kun ipa-raid sang gobyerno ang bodega sang mga trader agud mahibaluan ang matuod nga rason sang pagsaka sang presyo.
Ginalauman naman sini nga maganubo na ang presyo sa masunod nga semana bangud nagsugod na ang milling season.
