Nagbalik na ang presyo sang kamatis kag batwan, apang nagsaka naman ang presyo sang bombay.
Sa interview sang Bombo Radyo Bacolod kay Tereso Sampillo, vegetable vendor sa Libertad Public Market, amat-amat na nga nagbalik sa normal nga presyo ang pila ka mga lamas nga tuman ang pagsaka sang tinalikdan, apang may pipila naman nga nagsaka ang presyo.
Suno diri, nagpanaog na sa P70 ang kada kilo sang kamatis, nga sang Disyembre nagadangat sa P200.
Madumduman nga nakaligad nga semana, ang presyo ang una na nga nagpanaog sa P120 tubtob P130.
Samtang ang batwan na humalin sang Nobyembre tuman ang pagsaka nga nagdangat pa sa P180 tubtob P400, ang sa karun P40 nalang.
Ang repolyo ang sa karun P60 na lamang gikan sa nakaligad nga P120, ang Sayote ang P20 nalang ang dalagko gikan sa anay P30, kag ang talong nga sang tinalikdan P120 ang nagpanaog man sa P100.
Samtang nagsaka naman ang presyo sang bombay nga sa karun yara na sa P130 gikan sa anay P80.
Ang kalabasa ang nagsaka naman sa P35 gikan sa nakaligad nga P18 lamang.
Suno kay Sampillo, nagsaka ang presyo sang tinalikdan bangod sa pag-alburuto sang Bulkan Kanlaon.
Pahayag sini nga bangod wala sang patubas sa palibot sang Bulkan Kanlaon, sila ang nagakuha pa sang supply sa iban nga mga probinsya.
Apang sa karun amat-amat na nga nagabalik sa normal ang presyo, bango may-ara naman sang produksyon sa Bulkan Kanlaon.
