Kadungan sang pagsaka sang presyo sang produktong petrolyo, sunod-sunod naman ang pagsaka sang presyo sang karne sang baboy.
Suno kay Tata Tango, residente sa Barangay 32, Bacolod City, market vendor sa Libertad Public Market, nagsaka na sang P290 ang kada kilo sang baboy.
Nagahingyo ini kay Presidente Rodrigo Duterte nga masulosyunan ang sagunson nga pagmahal sang pork products.
Ginalantaw sini nga kabangdanan sa tuman nga pagmahal sang karne sang baboy amo ang dako nga numero sang buhi nga baboy nga ginapadala sa Manila.
Alegasyon sang Market Vendor nga ginapabay-an lang sang gobernador sa probinsya nga ipagwa ang truck-truck sang mga baboy kag sa baylo tuman nalang ka gamay ang nabilin nga supply sang baboy sa Negros Occidental.
Paathag ni Tango nga tanan nga piggery sa probinsya ang nagapagwa sang baboy agud nga ipadala sa Manila bangod milyon-milyon ang deposito sang mga ini sa probinsya.
Pahayag sang market vendor nga tuman ka makaluluoy kag naga-antos sa karun ang syudad sang Bacolod kag Probinsya sang Negros Occidental sa kakulang sang supply kag pagsaka sang presyo sang pork products.
Sa karun ang pinakamahal nga presyo sang baboy ang nagadangat na sa P290 ang kada kilo.
Suno kay Tango, kada semana nagasaka ang presyo kun sa diin sang nakaligad yara palang ini sa P265 ang kada kilo.
May ara naman sang nagakapilitan nalang nga magpanubo sang presyo agud nga mabaklan kadungan sa naluoy man ang mga ini sa mga manugbakal.
Aminado naman ini nga dako ang epekto sang pagsaka sa presyo sang gatong bangod kasunod sini nagasaka man ang presyo sang tanan nga balaklon kalakip na ang karne sang nanari-sari nga livestock.
Hingyo sang mga ini nga makontrolar ang pagsaka sang presyo sang mga balaklon kadungan pa sa pagseguro nga indi maubusan sang supply sang karne sang baboy ang Negros Occidental kag syudad sang Bacolod.
