Ginakahangawa sang meat vendor sa Libertad Public Market ang ginalauman nga dako nga pagsaka sa presyo sang karne sang baboy.
Sa interview sang Bombo Radyo Bacolod kay Alias Butchoy, wala sang problema sa supply sang baboy sa bilog nga Negros Occidental apang tuman ka damo sang mga nagapamakal nga gikan sa iban nga probinsya.
Suno diri, ang presyo sa karun sa kada kilo sang baboy sa Libertad Public Market ang nagahamboy sa P380 tubtob P400.
Ini ang mas mataas sang dako sa imported meat nga wala nagabag-o ang presyo kag yara gihapon sa P280 tubtob P300.
Apang ginapasalig naman ni Butchoy nga mas preska ang karne nga gikan mismo sa probinsya.
Apang suno diri, ang presyuhanay sang buhi nga baboy sa Negros Occidental kag Bacolod City ang manubo, gani ini ang ginahakot sang mga taga-Cebu kag Iloilo ukon iban pa nga probinsya.
Suno kay Butchoy, yara na sa P430 tubtob P450 ang baligyaanay sang karne sang baboy sa merkado sa Iloilo kag Cebu, nga tuman ka dako sang ginpatong gikan sa presyo sa pagkuha gikan sa mga nagasagod sang baboy.
Bangod sini, kaangay nga nagaduso ang mga hig raisers nga pasakaan man ang presyo sang buhi nga baboy bangod daw kaangay lamang nga ang mga retailers lamang ang makaginansya sang dako.
Sa baylo, ginalauman man nga magsaka ang presyo sang karne sang baboy sa merkado sa Bacolod City bangod magataas ang bili sang buhi nga baboy.
