Gin-athag sang provincial veterinarian sang Negros Occidental nga wala sang kakukalangan sa supply sang baboy sa probinsya.
Sa interview sang Bombo Radyo Bacolod kay Dr. Renante Decena, wala sang kakulang sang supply sa probinsya bangud ginauna nila ang supply sa Negros Occidental samtang ang sobra amo ang ginapadala sa Luzon, Iloilo kag iban pa nga bahin sang Pilipinas.
Suno kay Decena, isa sa mga factors nga nagsaka ang presyo sa bisan ano nga klase nga karne amo ang pagsaka sang presyo sang gatong kasubong man sang feeds bangod sa pagmahal sang raw materials sa paghimo sini.
Suno kay Decena, ang sunflower oil, soy beans kag corn oil ang gina-import.
Suno diri, naghugot man ang supply sa world market bangud sa Ukraine-Russia conflict.
Nahibaluan nga ang Ukraine ang isa sa pinakadako nga producer sang sunflower nga ila man nga national flower kasubong man ang wheat nga ginagamit man sa pagproduce sang feeds.
Suno kay Decena, santo sa ila nga weekly monitoring may yara sang pagsaka nga P3.49 kada kilo sang cara beef ukon P295 kada kilo sa merkado; P1.98 ang pagsaka sa kada kilo sang karne sang baka ukon P302 kada kilo kag P4.49 ang pagsaka sa kada kilo sang baboy ukon P264 ang kilo samtang sa broiler naman ukon sa manok may yara sang pagsaka nga P1.74 kada kilo ukon P200 kada kilo.
Suno sa provincial veterinarian, nagdangat na sa P300 kada kilo sang baboy sa syudad sang San Carlos; Talisay City kag banwa sang Hinigaran samtang sa ilog ang presyo sang baboy ang yara na sa P220 ang kada kilo.
