Kadungan sang pagsaka sang presyo sang nagapanguna nga mga balaklon, nagmahal naman ang presyo sang lechon baboy diri sa ciudad sang Bacolod antes pa man ang adlaw sang Paskwa kag ginalauman nga magasaka pa gid ini pila ka adlaw antes matapos ang tuig 2022.
Sa interview sang Bombo Radyo kay Loreto Toledo, nagabaligya sang lechon sa Purok Lechonan, Barangay 36, nagsaka sa P700 ang kada kilo sang len nagikan sa P600 nga presyo nagligad nga tuig.
Nagadanagat naman sa P8,000 tubtob P9,000 ang presyo sang bilog nga lechon nga nagabug-at sang 14 tubtob 16 kilos.
Suno kay Toledo, manami ang lakat sang ila nga negosyo ilabi na nga ginalauman pa gid ang pagdamo sang customer sa nagahilapit nga selebrasyon sang Paskwa.
Suno diri, nagsaka man ang presyo sang buhi nga baboy nga ila ginabakal sa southern Negros kag Negros Oriental gani nagsaka man ang presyo sang luto na.
Samtang suno naman kay Wilson Libera, manugbantay sa lechonan, apisar nga mahal ang baklanay sang baboy, ila ginatinguhaan nga makabaligya para mahatag ang gusto sang customer.
Suno diri, padayon lang sa gihapon ang ila negosyo apisar nga gamay ang ginansiya.
Subong pa lang, nag-abiso na si Libera nga magasaka pa gid ang presyo sang lechon kun malapit na ang Christmas Day tubtub sa pagtakop sang tuig kun sa diin lauman nga magadanagt ini sa P800 tubtob P900 per kilo.
