Ginpahayag sang mga nagabaligya sang lechon baboy sa Purok Lechonan, Barangay 36, sa ciudad sang Bacolod nga naga-amat amat na mahal ang presyo sang lechon, native man ukon commercial bangud sa nagahilapit nga holiday season.
Sa interview sang Bombo Radyo Bacolod kay Elvira Nombra, mas maayo ang pagbaligyaanay sang lechon karun ikumparar sang nagligad nga mga binulan.
Suno kay Nombra, nagmahal na ang pagbakal nila sang baboy sa ila ginakuhaan gani nagmahal man ang lechon nga ila ginabaligya.
Ginpahayag man sini nga native lechon ang ila ginabaligya nga mabakal sa P800 kada kilo kag ang bilog nga lechon ang mabakal sa P6,500 ang pinakamanubo kag nakadepende man ang presyo sa kadakuon.
Suno kay Nombra, ang ila nga ginakuhaan sang supply sang baboy amo ang banwa sang La Castellana, banwa sang Moises Padilla kag ciudad sang Kabankalan.
Samtang, ang commercial lechon ang wala man sang kinalain ang presyo sa native lechon bangud mahal naman ang ila nga pagbakal sang baboy.
Suno kay Alfonso Galiardo, sa karun maayo ang baklanay sang lechon kag may nabaton na sila nga mga pre-order apisar nga nagsaka ang presyo kag ginalantaw nga ini ang magasaka pagid.
Suno kay Galiardo, ang bilog nga lechon ang mabakal sa P7,000 ang pinakamanubo kag nakadepende man sa size ang presyo.
Suno diri, patupa ang pagbakal nila sang buhi nga baboy kun sa diin ila lamang ginalantaw kun sila ang may maginansya sa pagabaklon.
Ginalantaw nga magasaka pagid ang presyo sang lechon samtang nagahilapit ang adlaw sang paskwa.
