Ginpatuman na kaina sang aga ang bigtime price hike sa Liquified Petroleum Gas (LPG) para sa bulan sang Pebrero, apang tubtob sa karon wala pa sang price adjustment sa presyo sini sa mga ginabaligya sa ciudad sang Bacolod.
Sa interview sang Bombo Radyo kay Faith Joy Sancho, staff sang Petron Corporation, nakaligad nga bulan sang Disyembre nagdangat sa P277 ang presyo sang 2.7 kilograms, P696 sa 7 kilograms kag P1,039 sa 11 kilograms.
Apang nagnubo naman ang presyo sini subong nga bulan sang Enero nga P265 sa 2.7 kilograms, P665 sa 7 kilograms kag P993 sa 11 kilograms.
Tubtob sa karun amo sa gihapon ang presyo sang LPG nga suno kay Sancho kag ila pa ginahulat ang mando angot sa price adjustment.
Ginalauman nga sa magaabot nga bag-o nga supply, amo na nga makit-an ang pagsaka sang presyo.
Aminado man ini nga madugay ang pag-abot sang supply bangod nga madamo sang nagabakal direkta sa supplier labi na nga ginalaot sang mga consumers ang tion samtang manubo pa ang presyo sang LPG.
Samtang, panugyan sini sa mga manugbakal nga mas maayo kun may yara sang kaugalingon nga tanke sa pagabakal bangod mangin doble ang presyo sini kun lakip ang tanke sa pagbakal.
Paga-ekspetaran nga kapin P11.20 ang saka sa presyo sang Liquified Petroleum Gas (LPG) apang P6.25 naman ang saka sa kada litro sang AutoLPG sa bulan sang Pebrero.
