Mabuhinan naman ang gasto sang mga panimalay sa kinahanglanon sa pagluto bangud kadungan sang pagmahal sang presyo sang kalamay, nagbarato naman ang presyo sang mantika.
Sa interview sang Bombo Radyo kay Annie Bilaso nga nagabaligya sang mantika sa Libertad Public Market, P29 nalang ang bili subong sang mantika nga 410mL ukon isa ka lipid.
Ini ang nagnubo sang P6 nagikan sa P35 nga bili sang mantika duha na ka semana ang nakaligad.
Suno kay Bilaso, P35 ang pinakamataas nga presyo sang mantika nga ila ginabaligya apang may mga tinion nga nagdangat sa P38 ang baligya sang iban nga vendor.
Suno sa manugbaligya, mahimo nga nagdamo ang supply sa karon gani nagbarato man ang baligya sa ila sang supplier.
Ang supply sang mantika nga iya ginabaligya ang nagikan sa Dumaguete City, Negros Oriental.
