Nagapatigayon na sang monitoring ang Department of Trade and Industry kun ginasunod sang mga retailers ang Suggested Retail Price (SRP) sa mga School Supplies.
Sa interview sang Bombo Radyo Bacolod kay DTI – Negros Occidental Director Lynna Joy Cardinal, indi tanan nga school supplies ang may SRP bangod ang iban ang nakadepende man sa variety kag brand.
Paathag sini nga may classification lamang sa ginahatagan SRP kaangay lamang sa mga notebook kag papel kun sa diin ang may SRP amo ang 80 leaves, kag ang mga manipis ukon mas madamol diri ang wala na nalakip sa listahan.
Samtang may-ara naman sang SRP per piece ukon by bulk sa mga lapis kag ballpen, samtang may ginasunod man nga SRP ang ruler, eraser, sharpener kag pila pa ka elected items.
Nakahibalo naman ang mga retailers sang SRP bangod sila ang ginahatagan man sang kopya sang 2024-2025 SRP list sang DTI kasubong man sang ila mga suppliers.
Paathag sini nga mas manubo man sangsa SRP ang presyo gikan sa manufacturer gani ini ang sarang gid nga masunod sang retailer.
Pahanumdom ni Cardinal nga kun magbakal sang school supplies, mas maayo nga magcanvas anay bangod may mga supplies nga wala nalakip sa listahan sang ma-implementaran sang SRP.
