Ginkumpirmar ni Provincial Agriculturist Atty. Japhet Masculino nga nagahamboy sa P150 tubtob P200 kada kilo ang presyo sang paitan sa Negros Occidental santo sa latest monitoring sang marketing section sang OPA.
Nahibaluan nga pila ka mga merkado karon sa Metro Manila ang nagabaligya sang paitan nga nagabili sang P850 kada kilo.
Sa interview sang Bombo Radyo Bacolod kay Masculino, ginpahayag sini nga bangud sa dako nga demand karon sang paitan tuga sang Christmas season, rason kun ngaa may pagsaka sa presyo sini.
Gin-athag man sang provincial agriculturist nga wala sang kakulang sa suplay sang paitan sa probinsya apang may diutay nga pagsaka gid man sa presyo sini.
Dugang pa ni Masculino nga diri pa nagakuha sang suplay sang paitan ang taga Panay island.
Nahibaluan nga may yara sang tanoman sang paitan sa San Carlos City, Canlaon, kag La Castellana diri sa probinsya.
Samtang, nagalaom naman ini nga mahatagan sang pagtamod ang farm to market roads bangud tuman ka importante kag dako nga bagay ang pagtransport sang farm products padulong sa merkado.
