Nagsaka ang presyo sang palupok nga himo sang mga manufacturers sa banwa sang Hinigaran, Negros Occidental subong nga tuig.
Sa interview sang Bombo Radyo kay Navarro Baylon, presidente sang Hinigaran Firecrackers Manufacturers, Dealers and Retailers Association, nagmahal ang raw materials sa paghimo sang palupok nga ginabakal nila sa Bulacan.
Ini ang kaangay na gid lamang sang polbora nga nagmahal sang 40 tubtub 60 pesos kada kilo; samtang nagmahal man ang papel kag pabilo nga gina-import nagikan sa China kag gina-import sang mga Negrense sa Bulacan.
Bangud sini, nagsaka sang piso ang presyo sang kada bilog sang palupok kaangay sang pwitis agud nga ila mabawian ang kapital.
Suno kay Baylon, nag-manufacture sila sang mas madamo nga volume subong nga tuig kun ipaanggid sang tinalikdan bangud wala na sang pamahog nga ipatuman ang total ban sa firecrackers sa pungsod kundi nag-issue lang sang executive order si Presidente Rodrigo Duterte nga iregulate sang maayo ang palupok.
Suno diri, ingat paputok ang ila kampanya bangud kun iwas paputok, apektado ang ila negosyo.
Paathag sini, sarang gid makapalupok basta maghalong nga indi mabutang sa peligro.
Ginpasalig man sini nga wala sila nag-manufacture sang mga firecrackers nga ginadumilian.
