Ginalantaw nga magasaka ang presyo sang plane tickets antes magtakop ang tuig bangud ginaduso sang airlines nga magkolekta sang bag-o nga balayran nga tubtob sa P300 kada flight.
Ini agud nga ma-cover ang price hikes nga ginapatuman sa Ninoy Aquino International Airport (NAIA).
Ang domestic carriers nga Philippine Airlines (PAL), Cebu Pacific kag AirAsia Philippines ang nagdangop sa Civil Aeronautics Board (CAB) kag naghingyo nga aprubahan ang koleksyon sang terminal enhancement fee agud buligan man sila nga maka-recover sa nagasaka nga gasto sa NAIA.Base sa impormasyon, ang tatlo ka carriers ang nagaduso sang terminal enhancement fee nga P75 per way sa domestic flights, buot silingon ang kada pasahero sa local round trip ang mahimo magbayad sang dugang nga P150.
Isa man sa ginaduso sang pila ka mga airline companies terminal enhancement fee nga P300 per way para sa international flights, samtang may yara man nga P275 per way lamang sa foreign trips apang masami nga limitado lang sa Southeast Asia kag Northeast Asia.
Bangud sa sa developments nagsaka ang service charges sa NAIA.
Nagsaka man ang airport costs humalin sang pagbulos sang New NAIA Infrastructure Corporation sang tinalikdan nga bulan kun sa diin ginpatuman ang P170.6-billion upgrade sang nasambit nga airport.
