Ginpagwa na sang Philippine Tennis Association (PHILTA) ang mga presyo sang ticket kag ang selling date para sa nagahilapit nga Philippine Women’s Open, nga pagahiwatan sa una nga kahigayunan diri sa Pilipinas.
Humalin kahapon, Enero 14, mahimo na makabakal sang mga ticket para sa qualifying kag main draw sang hampang, online man ukon onsite.
Base sa ginpagwa nga mga presyo sang ticket, magalab-ot sang P200 ang balor sang kada adlaw nga ticket para sa qualifying match, samtang sa una nga apat ka adlaw sang main draw match ini ang magasaka sa P1,000 kada ticket.
Suno kay PHILTA Executive Director Tonette Mendoza, may ara pa gid sang liwat nga pagbag-o sa presyo sa pag-abot sang semifinals kag finals.
Pahayag ni Mendoza nga luyag sang gobyerno nga makakadto ang tanan nga luyag makakita ilabi na nga ini ang una nga kahigayunan nga maga-host ang Pilipinas sang nasambit nga tournament.
Ginpasiguro sang PHILTA nga preparado na ang Rizal Memorial Tennis Center para sa pahampang.
