Ginpahayag sang tag-iya sang isa ka bakery sa Barangay Banago, ciudad sang Bacolod nga naggamay ang size sang tinapay bangud doble ang saka sa presyo sang panakot.
Sa interview sang Bombo Radyo kay Rodalino Maligid, wala sang pagbag-o sa presyo sang tinapay sini apang nagbawi naman ini sa size nga sa karun magamay nalang.
Ginabaligya sini ang tinapay sa presyo nga P2.00 kag P5.00.
Suno diri kun iya pasakaan ang presyo, mahimo naman nga indi makasarang magbakal ang pigado.
Pahayag ni Maligid, nagdoble ang presyo sang mga panakot para sa tinapay kun sa diin ang container sang mantika naga balor sang P600 sang nakaligad nga nangin P1000 na sa karun, gikan sa P700 nga sako sang harina nagin P995 na, kalamay sa P1600 nangin P3800, gatas sa P2800 nangin P4500, margarine nga P1800 sa kada tab nangin P3500 kag kasubong man sa yeast nga P60 nangin P120 na.
Suno diri, masami ini magpa-deliver sang mga panakot apang sa karun kusa na lang ini nga nagapatinda kag magbakal, iya man gin ginapanuboan ang ginabakal nga kinilo ukon sinako nga panakot para makasulod sa budget.
