Pilason ang anum ka mga persona sa aksidente nga nagluntad sa Access Road sakop sang Hacienda Minuluan, Barangay Matab-ang, ciudad sang Talisay, Negros Occidental, pasado las 5 sang aga, Domingo, Disiembre 17.
Ginkilala ang driver sang isa ka Toyota Innova nga si Ana Marie Gonzaga, 73 samtang sakay sini sanday Andrew Clarke Hoover, 55, American citizen; Maria Cristian Hoover 46 kag tatlo sini ka mga menor de edad nga kabataan.
Sa interview sang Bombo Radyo Bacolod kay Police Major Wilfredo Benoman Jr., deputy chief sang Talisay City Police, padulong sa Bacolod-Silay Airport ang salakyan sang nakabunggo ini sa center island sang dalan kag natakilid.
Suno kay Benoman, wala mahibaluan kun ano ang rason nga nakabunggo ini sa centre island apang ginalantaw nga namiscalculate sini ang pagkambiya sang salakyan gani nakabunggo kag nagtakilid ini.
Gilayon nga gindala sa ospital ang driver sang salakyan agud nga magpacheck-up samtang ang iban nga sakay sa salakyan ang nagpauli man sa ila mga puluy-an matapos ang insidente.
Nagpasalamat man si Benoman nga wala sang nagasunod nga salakyan sang nagluntad ang aksidente.
Nagpanugyan man ini sa publiko nga siguruhon nga maayo ang kondisyon sa tion nga magmaneho agud nga malikawan ang aksidente.
