Wala sang pagbag-o sa presyo sang bugas sa Burgos Public Market apisar nga epektibo na subong nga adlaw ang Executive Order No. 39 ni President Ferdinand Marcos Jr. nga nagatalana sa price ceiling nga P41 sa kada kilo sang regular-milled rice kag P45 sa kada kilo sa well-milled rice.
Sa interview sang Bombo Radyo kay Beltran Villanueva, retailer sang bugas sa Burgos Public Market, wala ini anay nagsunod sa price ceiling bangud madamo pa ini sang stock sang bugas nga iya nabakal sa mahal nga presyo gani kun iya panubuan, siya ang mamierdehan. Suno sa iya, wala pa ini nag-order sang bag-o nga stock bangud iya anay paubuson ang iya supply kag magapanilag pa ini kun ano ang matabo.
Suno kay Villanueva, madamo sa mga retailers ang wala anay nagsunod sa price ceiling bangud sila ang mamierde kag magahulat-hulat anay kun ano ang matabo.
Suno diri, kun siya ang piliton nga magpatuman gilayon sang price cap apisar nga wala pa naubos ang iya stock, manira na lamang ini kag mas pilion nga ikonsomo ang iya baligya.
Suno kay Villanueva, kuntani ginhatagan sila sang allowance agud makapaubos sang daan sang stock bangud magasunod lamang sila kun barato man ang ila kuha sa supplier.
Suno sa iya, apisar nga may subsidy nga igahatag ang gobyerno sa mga rice retailers nga apektado sang price ceiling, posible nga madugay pa ini nga mag-abot.
Nagapanawagan ini nga kuntani ang mga dalagko nga traders kag mga hoarders ang lagson sang gobyerno kag indi pagpahanugutan nga sila nga mga retailer, nga nagasunod lamang sa presyo sang supplier, ang magaantos.
