Aminado ang branch manager sang Prime Water Incorporated nga challenge sa ila nga part ang 24/7 nga paghimuno sang tubig sa mga konsumedor apang isa ini sa ila mga prayoridad.
Nahibaluan nga malapit duha na ka semana sumugod sang nagdumala ang Prime Water sa Bacolod City Water District (BACIWA).
Sa interview sang Bombo Radyo kay Lily Donasco, ginpahayag sini nga nagapadayon pa ang ila nga assessment sang operasyon kag pag-adjust sang water system.
Suno kay Donasco, ginabanta yara sa 195 ang working force sang Prime Waters nga nagikan sa BACIWA samtang 23 naman ang nagapabilin nga empleyado sang gobyerno kag napaidalum sa contract monitoring unit.
Suno sa iya, sila ang nagasiguro nga nagasunod sa kontrata sang joint venture agreement ang Prime Water.
Suno diri, sang mag-assume ang Prime Water sa operasyon, gilayon sila nga nagpatigayon sang massive leak detection.
Aminado man ini nga medyo mabudlay sa ila ang pagprovide sang tubig 24/7 sa mga konsumedor kag suno diri, indi sila insigida nga maka-eksperyensya sini apang nagalaom siya nga sa masunod nga anum ka bulan, mabatyagan sang mga konsumedor ang improvement sa ila mga tubig.
Yara naman sa 35 tubtob 37% suno kay Donaso ang non-revenue water.
Gindugang man sini nga nagretire na si Atty. Juliana Carbon bilang general manager sang BACIWA kag sa karun si Engr. Michael Soliva ang officer-in-charge.
Nagpahanumdum man ini sa mga konsumedor nga apisar sa Enero 2021 pa magatake-effect ang disconnection, mas maayo kun magbayad na sila nga daan bangud pila ka bulan man nga wala sang koleksyon ang BACIWA kag agud indi magtingob ang ila mga balayran.
