May ginapatigayon na nga proseso para sa iplastar nga support column agud masaylo ang dako nga tubo sang Bacolod City Water District (BACIWA) nga nahamtang sa tunga sang Bakyas Bridge sa Barangay Mansilingan, Bacolod City.
Madumduman nga ang tubo ang anay nahamtang sa kilid sang taytay apang wala matandog sang nagpatigayon sang widening gani ini ang nagpabilin sa tunga.
Sa karun, nalumutan na lamang ang nasambitan nga tubo kag ginbutangan nalang sang mga street sweeper sang bulak sa punta agud makita sang mga motorista partikular na sa mga bag-o lamang makalabay sa taytay.
Sa interview sang Bombo Radyo Bacolod kay BACIWA General-Manager Mona Dia Jardin, gin-athag sini nga nalawigan antes makuha ang tubo bangod sila ang una nga nakig-angot sa Department of Public Works and Highways (DPWH) – Bacolod, apang sila ang indi makadesisyon kag ginpasa ang request sa DPWH Region 6.
Una nga gina-ayo sang BACIWA Primewater nga ma-attach ang tubo sa kilid sang taytay kaangay sa nakaandan nga ginhimo apang wala nagsugot ang DPWH sa panindugan nga maguba ang aesthetic sang taytay.
Bangod sini, nagdesisyon na lamang ang Primewater nga mag-alokar sang pondo sa pagtukod sang support column nga amo ang sayluhan sang tubo.
Wala na ginpatpat ni Jardin ang balor sang budget sa proyekto apang, suno diri ini ang minilyon ka pesos.
Santo sa kasugtanan sang BACIWA Primewater kag DPWH, dapat nga matapos ang pagtransfer antes matapos ang 2024.
Ginapakamaayo man ni Jardin nga antes paman ang desisyon, may nakastandby na nga contractor nga magakapot sang proyekto.
