Nagpasalig na ang Primewater nga ila isaylo ang dako nga tubo sang Bacolod City Water District nga yara sa tunga sang Bakyas Bridge sa Barangay Mansilingan, Bacolod City, sa ila gintukod nga bracket sa ulihi nga inadlaw sang subong nga semana ukon una nga inadlaw sang masunod nga semana.
Sa interview kay Bacolod City Councilor Bobby Rojas, chairperson sa Committee on Energy and Public Utilities, nakasugilanon na sini ang opisyal sang Primewater kag nagpasalig na ang mga ini nga tinguhaan nga mapadasig ang pagsaylo sang tubo.
Pahanumdom sang konsehal nga sa pagsugod sang roadwidening, una nga naplano nga i-attach kuntani ang tubo sa kilid sang ginpalapad nga taytay.
Apang sa ulihi, gin-athag sang contractor sang taytay nga kinahanglan gid maghimo sang separado nga platform ang primewater bangod indi pwede nga itakod ang tubo sa taytay bangod ini ang tuman ka dako.
Gani nagpabilin sa tunga sang taytay ang tubo, nga nagatuga sang trapiko kag peligro partikular na sa mga indi kabisado ang dalan kag nagabyahe kun gab-i.
Dugang pa ni Rojas nga nagcontact man ang Department of Public Works and Highways sa Primewater nga padasigon ang pagsaylo.
Suno kay Rojas, ginpahayag sang Primewater nga nadugayan ang proyekto bangod ginpalab-ot pa nila ang concern sa ila national headquarters kag naghulat nga madownload ang budget.
Samtang sa pagtsekyar sang Bombo News Team sa area, nakita nga malapit na matapos ang bracket, apang wala lamang natakod ang tubo bangod sa curing process sang semento.
Ginalantaw nga itakod na lamang diri ang tubo kag trabahuon agud nga masecure sa platform.
Nagalaom man ini nga mangin madasig lamang ang pagsaylo, bangod ang tubo ang gina-iligan sang tubig kag madamo sang maapektuhan sa temporaryo nga pagpatay samtang ginapatigayon ang pagsaylo.
Samtang, ginapakamaayo sang alkalde sa ciudad sang Bacolod kun matuman sang Primewater ang pasalig nga isaylo na ang water pipe nga yara sa tunga sang Bakyas Bridge sa Barangay Mansilingan, Bacolod City sa masunod nga semana.
Sa interview kay Bacolod City Mayor Greg Gasataya, nasugilanon sini si Bacolod City Water District (BACIWA) General Manager Mona Dia Jardin, kag suno sa opisyal nagpasalig na ang Primewater nga ifinalize na ang pagsaylo sang tubo sa masunod nga semana.
Sa impormasyon nga nabatun sang alkalde, 80 porsyento na nga natapos ang construction sang platform nga hamtangan sang tubo.
Apang may-ara sang nangin conflict sa tunga sang contractor kag primewater gani na-untat ang construction.
Suno kay Mayor Greg, wala na labot ang ciudad sa problema sang duha ka kampo bangod ang ila lamang nga concern amo ang mapalos na ang tubo sa tunga sang taytay.
Ini bangod nagahatag sang risgo sa mga nagalabay ang nasambitan nga tubo, partikular na kun gab-i, kag ini ang nagapalala man sa traffic congestion.
Suno kay Mayor Greg, madugay na nga natapos ang road widening project sang Department of Public Works and Highways (DPWH) sa nasambitan nga taytay, apang indi gid mapuslan bangod may-ara sang nagabalabag nga tubo sa dalan.
