Nabayaran na sang Primewater ang utang sini nga P11 million sa Bacolod Bulk Water Inc. kag iban pa nga Water Suppliers kag Contractors.
Madumduman nga nagpaandam si Bacolod City Water District (BACIWA) Chairman Atty. Sonia Verdeflor sa mga Bacolodnon nga magstore sang tubig sa posibilidad nga madula ang supply subong nga Lunes bangod wala pa nakabayad sang utang ang Primewater.
Sang Sabado, natigayon nga nasettle sang Primewater ang outstanding obligations sini.
Sa interview sang Bombo Radyo kay Bacolod City Mayor Greg Gasataya, nagapangabay ini nga dapat sundon kun ano man ang nabutang sa Joint Venture Agreement agud malikawan ang kaangay nga problema.
Suno diri, ang pagkadula sang tubig sa ciudad madugay na nga problema kag nagpasalig ini nga kun may problema nga magluntad nga maka-apekto sa pumuluyo, hatagan ini gilayon sang tikang.
Suno pa sa alkalde, indi ini ang una nga kahigayunan nga natabo nga wala nakabayad ang Primewater, kun madumduman sang Hulyo nagpagwa man sang statement ang BACIWA nga wala man nasettle sang Primewater ang ila outstanding obligations.
