Nagapati ang school principal sang Bacolod City National High School nga ang paghukas sang senior high school program sa state universities kag local colleges makatuga sang congestion sa public high schools.
Sa interview sang Bombo Radyo Bacolod kay Richard Gelangre, ang pagpatuman sang senior high school program ang gilayon lang nga gin-implementar amo nga naghatag sang budget ang gobyerno sa mga buluthuan nga maga-offer sini, kga bangod nga natapos na ang tion nga makapreparar ang mga buluthuan, untatan na sang gobyerno ang paghatag sang budget sa mga state universities kag local colleges.
Bangod sini, suno kay Gelangre kun wala na sang senior high school program sa state universities kag local colleges, ini makatuga sang congestion sa public high schools.
Dugang pa sini, kun tuman ka damo sang mga estudyante ini makaresulta lamang sa pagnubo sang kalidad sang edukasyon bangod man nga may kakulangan sang mga manunudlo kag mga classrooms.
Samtang, may yara man sang impormasyon nga pagkatapos sang Grade 10, ang estudyante pakuhaon sang exam kun ini bala kinahanglan pa magpadayon sa Grade 11 kag Grade 12 ukon makaderetso na sa kolehiyo, apang ini indi pa kumpirmado nga impormasyon, paathag ni Gelangre.
Sa karun, nagapanawagan ini sa Department of Education nga -iklaro kun ano ang matabo sa SHS program kag indi pag-ipasa sa buluthuan ang pagsolsuyon sa problema.
