Ginakalipay sang principal sang Andres Bonifacio Elementary School 1 nga halos 100 porsyento sang mga nag-enroll ang present sa una nga adlaw sang opening of classes para sa School Year 2024-2025.
Sa interview sang Bombo Radyo Bacolod kay Arnel Areola, ginapasalamatan gid sini ang tanan nga nagbulig sa pagpreparar sang eskwelahan sa isa ka semana nga Brigada Eskwela.
Magluwas sa mga ginikanan, nagbulig sa pagpaninlo kag naghatag donasyon ang pila ka mga grupo kasubong man ang Philippine Amusement and Gaming Corporation (PAGCOR).
Ginapakamaayo man sini nga sila ang kompleto sa classrooms, pulungkuan kag manunudlo gani sila ang handa gid sa pagbukas sang klase.
Suno kay Areola, madamo pa sang mga late enrollees kag transferees, kag pasalig sini nga batunon gid sang ABES 1 ang magapadulong sa ila agud mag-enroll sang kabataan.
Pahayag sang principal nga sila ang nagalaom sang masobra 1,200 nga mga enrollees para sa School Year 2024-2025 kag sa karun ya palang sa 1,100 ang naka-enroll.
Dugang pa sini nga may pila pa ka mga anay estudyante nga wala pa makabalik sa agud mag-enroll sa buluthuan.
Ang ila mga transfer students ang masobra na sa 70, nga sunod kay Areola kalabanan nagsaylo sang puluy-an, mas malapit ang balay sa ABES 1 ukon gikan sa private schools kag nagdesisyon nga magsaylo sa pampubliko nga eskwelahan.
Ginapasalamatan man sini ang Bacolod City Public Order and Safety Office (POSO) nga gin-augment agud magbulig sa pagbantay sa una nga adlaw sang pagbukas sang klase nga nagabulig sa pagpatabok sang mga kabataan sa dalan.
May ginbutang man nga Police Assistance kag POSO desk sa atubang sang ila nga buluthuan.
