Aminado ang principal sang Bacolod City National High School nga paborable para sa mga estudyante kag manunudlo ang temprano pa nga pagsugod sang klase.
Sa interview sang Bombo Radyo kay Richard Gelangre, half day lang ang klase sugod sang Abril 26 kun sa diin nagaumpisa ang klase alas-6:30 sa aga, kag mahimo nga mangin tubtub na ini sa katapusan sang mainit nga panahon.
Ginapasulod man lang ang mga estudyante nga ma-late sa alas-6:30 nga klase.
Wala naman sang reklamo diri ang mga ginikanan bangud makapauli naman ang ila kabataan alas-12:00 sa udto.
Suno kay Gelangre, mas maayo ang ini nga set up kun sa diin wala man sang nareport nga estudyante nga na-nosebleed ukon nasunggo bangud maayo man ang ventilation.
Suno sa principal, tatlo tubtub apat ka electric fan ang yara sa sulod sang isa ka kwarto.
Isa naman sa mga concerns sa karon sang principal ang kawatay sang kable sang kuryente sa BCNHS bangud apektado diri ang mga classrooms.
Suno diri, makaduha na ka beses nakawatan ang BCNHS.
