Nagpasalamat ang principal sang Bacolod City National High School sa tanan nga mga nagbulig agud nga mahanda ang mga eskwelahan sa pagbukas sang klase sa Lunes, Hulyo 29.
Sa interview sang Bombo Radyo Bacolod kay Richard Gelangre, nagpasalamat ini sa tanan nga nagsuporta sa Brigada Eskwela halin sang Hulyo 22 tubtub Hulyo 26 kun sa diin may mga naghatag sang materyales kag labor.
Suno kay Gelangre, wala pa nasuma ang kabug-usan nga materyales nga gindonar sa eskwelahan kadungan sang Brigada Eskwela apang indi na contest sa karon ang maintenance week.
Sa idalom sang guidelines nga ginpagwa ni former Secretary Sara Duterte nga amo ang ginabasehan sang Brigada Eskwela subong nga school year suno kay Gelangre, ginmandu sini nga indi na contest ang maintenance week gani nabuhinan man ang huol nga ginaatubang sang mga manunudlo.
Aminado ini sang tinalikdan nga contest pa ang Brigada Eskwela, may internal shaming sa mga eskwelahan gani nagakapilitan ang mga manunudlo nga taason ang ila performance sa pagkolekta sang mga donasyon.
Suno diri, nagakapilitan ang manunudlo nga kaayuhon ang kampanya sa Brigada Eskwela bangud mahuya ini sa kaangay niya nga manunudlo kun malabawan sila sang iban nga eskwelahan bangud ini na ang kultura sa mga eskwelahan.
