Nakagwa na sa intensive care unit ang principal sang Guinpana-an Elementary School sa banwa sang Moises Padilla nga nadanlog sa hagdan kag nahulog matapos nga manglimpyo sa atop sang classroom.
Madumduman nga sang Domingo, kapin alas- 6:00 sang gab-i, nagsaka sa atop sang classroomn ang principal nga si Reynaldo Mojares para magpanglimpyo.
Pagpanaog ni Mojares natumba ang kahoy nga hagdan gani ini ang nadagdag kag natam-an ang iya ulo.
Sa interview sang Bombo Radyo kay District Supervisor Gideon Panganiban, conscious pa si Mojares pag-abot sang ambulance apang samtang nagabyahe na padulong sa ospital sa ciudad sang Bacolod, ini ang nadulaan sang pangalibutan.
Suno kay Panganiban, sa karun nakagwa na sa ICU si Mojares, apang nagapablin nga kritikal ang iya kondisyon kag unconscious sa gihapon.
Pahayag ni Panganiban, may bulig pinansyal nga mabaton ang pamilya Mojares gikan sa Moises Padilla Public School Teachers League.
