Gin-athag sang school principal sang Negros Occidental High School (NONHS) nga humalin pa sang Enero ginapatuman na ang memorandum sang DepEd nga indi makareport physically sa eskwelahan ang mga teaching kag non teaching personnel nga unvaccinated apang magapadayon ang work from home arrangements.
Sa interview sang Bombo Radyo Bacolod kay Josette Segun Terrora, ginpahayag sini nga wala siya sang intention nga idiscriminate ang 13 ka mga manunudlo nga wala nakapabakuna batok sa COVID-19.
Suno kay Terrora, mahimo nga sa pagpaidalom sa syudad sa Alert Level 1, nagdumdom ang mga ini nga apisar nga wala mabakunahan mahimo na nga makareport sa eskwelahan bangud 100 percent capacity na ang ginapahanugutan sa mga government offices.
Suno sa school principal ang mga wala pa nabakunahan nga mga personnel ang mahimo man sa gihapon nga magreport sa eskwelahan physically apang dapat magpakita sang negatibo nga resulta sang Antigen ukon RT PCR test nagikan sa DOH accredited laboratories.
Suno diri, mahimo man makahatag serbisyo ang non-teaching kag teaching personnel sang eskwelahan apisar nga nagawork from home ang mga ini kag nagapadayon man ang ila nga sweldo.
Health condition kag kahadlok sa bakuna ang kalabanan nga rason sang indi pagpabakuna sang 13 ka mga personnel sang NOHS.
Nagpanindugan man si Terrora nga wala sila nagkulang sa pagpahanumdom sa mga personnel sang NOHS sang importansya sang pagpabakuna bangud nagpatigayon man sila sang symposiums kag orientation.
Nagpasalig man ini nga lunsay mga bakunado na ang kapin 400 nga mga manunudlo sa NOHS.
Samtang, ginahulat lamang nila ang approval sa application sang progressive limited face to face classes.
Ginahulat man sang mga ini ang maathag nga pagsulundan sa mga wala nabakunahan nga mga personnel kun yara sa Alert Level 1 ang isa ka lugar.
Nagpanugyan man ini sa mga wala pa nabakunahan nga magpabakuna na bangud para man ini sa kaayuhan sang tanan.
