Para sa selebrasyon sang ika-162 nga kaadlawan ni Dr José Protasio Rizal Mercado y Alonso Realonda, nagpatigayon sang programa ang Rizal Elementary School bilang pasidungog sa national hero sang Pilipinas.
Ang selebrasyon nga ginhiwat sa Rizal Park ang gintambongan nanday acting Vice Mayor Councilor Thaddy Sayson kag Councilor Celia Flor, Councilor Simple Distrito, Department Of Education Officials kag Rizal Elementary School.
Sa interview sang Bombo Radyo kay Rizal Elementary School Principal Pedro Crispe Jr, indi lamang ang adlaw sang kamatayon ni Rizal ang ila ginaselebrar kada tuig kundi ila man ginahatagan sang pagsidungog ang kaadlawan sini kun sa diin siya ginbun-ag sang Hunyo 19, 1861.
Suno kay Crispe, kaina nagpatigayon sila sang flag raising, tree planting sang duha ka narra tree bilang pagdumdom kay Rizal kag role playing sang kabuhi sini.
Mensahe ni Crispe sa mga pamatan-on, kaangay sang pahayag ni Rizal nga “The youth is the hope of the Fatherland”, tinguhaan sang mga bag-o nga henerasyon sang pungsod, kilalahon si Rizal indi lamang bilang bagani apang tun-an man kun paano ini nangin National Hero kag gamiton ini bilang inspirasyon sa kabuhi kag ang ideya kag vision ni Rizal ang dapat tumanon bilang isa ka Pilipino.
