Gin-ako sang inmate nga nagpalagyo sa Bacolod Police Station 9 nga nagahinulsol ini sa iya nga gin-ubra.
Madumduman nga nagpalagyo si Gabriel Liboon, 29-anyos sang Purok Nami-nami 1, Brgy. Sum-ag sa Bacolod Police Station 9 sang Enero 17 sang aga.
Ini matapos nga iya ginlukit ang kandado sang selda gamit ang lock pick.
Balik-prisuhan na si Liboon matapos ini nagsungka kag ginsugat sa Crossing Central, Brgy. Purisima, Manapla kahapon sang hapon.
Sa interview sang Bombo Radyo kay Liboon, ginpahayag sini nga nagahinulsol siya sa iya nga gin-ubra bangud nakatuga ini sang perwisyo sa iya nga pamilya kag kapulisan ilabi na sa duty jailer.
Nangayo ini sang sinsero nga pasaylo sa gamo nga iya natuga sa police station kag nagpasalamat man ini sa maayo nga pagtatap sa iya sa sulod sang selda.
Suno kay Liboon, nalagyo ini bangud nahidlaw na siya sa iya nga pamilya apang nareyalisar sini nga makaguwa man siya sa gihapon sa ulihi kag makaupdanay sila liwat sa legal nga paagi.
Si Liboon ang may yara sang duha ka mga kabataan nga naga-edad apat ka tuig kag duha ka tuig kag suno sa inmate, bug-os niya nga atubangon ang kaso agud makaupod liwat ang mga ini.
Si Liboon ang naaresto sang Enero 8, 2020 lamang sa kaso nga paglapas sa R.A. 9165 kasunod sang buybust operation batok sa iya.
