Nagsungka na subong nga hapon ang inmate nga nagpalagyo sa Bacolod Police Station 9 sang Biyernes sang aga.
Madumduman nga nagpalagyo ang inmate nga si Gabriel Liboon, 29-anyos sang Purok Nami-nami 1, Brgy. Sum-ag sa Bacolod Police Station 9 sang Enero 17 sang aga.
Ini matapos nga iya ginlukit ang kandado sang selda gamit ang lock pick.
Si Liboon ang naaresto sang Enero 8, 2020, lamang sa kaso nga paglapas sa RA 9165 kasunod sang buybust operation batok sa iya.
Si Liboon ang nakabalik sa prisuhan sa pagbuligay sang Bacolod Police Station 9 kag Manapla Municipal Police Station.
Sa interview sang Bombo Radyo kay Police Lieutenant Victor Blaza, deputy chief of police sang Manapla Municipal Police Station, ginkompirmar sini nga ginsugat si Liboon sa Crossing Central, Brgy. Purisima, Manapla, pasado alas 2:00 kaina sang hapon.
Suno kay Blaza, kaupod ni Liboon ang iya nga pamilya sang ini ang ginsugat sa Manapla.
Nahibaluan nga adopted child si Liboon kag taga-Manapla ang iya nga biological parents.
Ginpahayag man sang station commander sang Bacolod Police Station 9 nga may yara sang negotiation nga natabo sa ila sang live-in partner ni Liboon.
Suno kay Police Lt. Jovito Pastrana, nagkadto kahapon sa Bacolod Police Station 9 ang live-in partner sini kag gin-istorya niya ini nga kumbinsihon si Liboon nga magvoluntary surrender.
Suno kay Pastrana, ginpresentar sini ang mga disadvantages kun magpabilin nga yara sa gwa sang prisuhan ang suspetsado.
Ginpaathag man sang station commander nga wala sang pagpamahog nga natabo kundi ginlaygayan niya lang ang pamilya sang inmate.
Nangayo man ini sang bulig sa iban nga mga police operatives kag nagcoordinate sa Manapla PNP agud mangin hilway ang ila nga pagsugat kay Liboon.
Nalipay man si Pastrana nga nangin epektibo ang ila ginhimo nga stratehiya nga pag-istorya sa pamilya sang suspetsado.
