Wala nakaagwanta kag nagsungka man ang priso nga nagpalagyo sa Bureau of Jail Management and Penology (BJMP) Sagay matapos ang ginpatigayon nga manhunt operation kag bayluhanay sang luthang sa ciudad sang Bacolod.
Una diri, nagpalagyo sa BJMP Sagay nagligad nga Enero 29 ang priso nga si Ronel Sebuan Alyas Dodoy, 24, single sang Hacienda Balud, Brgy. Tadlong, Sagay City kag nagpadulong ini sa ciudad sang Bacolod.
Gingamit pa sini nga get-away vehicle ang motorsiklo nga ginagamit man sang BJMP.
Apang bangud posible wala ini sang kakilala ukon himata sa Bacolod, naglibot-libot lang ini sa Brgy. Mandalagan kag Villamonte kahapon.
![](https://img.bomboradyo.com/bacolod/2020/01/BJMP.png)
Matapos nga nakalapalagyo nagpatigayon sang manhunt operation ang mga katapo sang BJMP Sagay kun sa diin naglinagsanay pa sa sakop sang Villamonte kag Mandalagan tubtob nga na-corner ini.
Sa interview sa commander sang Police Station 4 nga si Police Major Renante Jomocan, nga nagbulig man sa paglagas sa suspetsado, nagsungka na lang si Sebuan matapos nga nagbayluhanay na sila sang luthang sang BJMP personnel nga nagalagas sa iya.
Posible suno kay Jomocan, posible nga ginkulbaan na man lang si Sebuan sang nag-ulan na ang bala.
Alas-9:00 kahapon sang aga sang na-corner si Sebuan sa Sitio Utas, Mandalagan.
Nahibaluan nga may yara sang pending trial si Sebuan sa kaso nga paglapas sa RA 6539 nukon Anti-Carnapping Act of 1972.