Nagpatigayon sang pagsinapol si Vice Governor Jeffrey Ferrer kaupod ang Negros Occidental Police Provincial Office, Negros Occidental District Jail kag Bago City Police Station nahanungod sa pagtinlo sa district jail.
Ini ang kasunod sang imbestigasyon sa buybust operation nga ginpatigayon sang Regional Drug Enforcement Unit (RDEU) 6 sa South Capitol Road kun sa diin nagabalor sang P6.8 million nga suspected shabu ang nakumpiskar sa ginapahayag miyembro sang Divinagracia drug group sang nagligad nga Nobyembre 15.
Nagagwa sa imbestigasyon nga naghalin sa isa ka wala ginhingadlan nga priso sa NODJ ang transaksyon sang iligal nga druga, base sa narekober nga cellphone sa buybust operation.
Suno kay Ferrer, luyag niya maghimo sang tikang agud matapna ang illegal drug trade sa sulod mismo sang prisuhan nga daw kaangay na lamang nga ginahimo bilang command center.
Apang, antes ini magsapol sa mga otoridad, nagpangayo si Ferrer sang pahanugot kay Governor Eugenio Jose “Bong” Lacson.
