Wala na matabangan pa ang isa ka priso nga nag-suicide sa sulod sang banyo sang detention cell sini sa Pulupandan Municipal Police Station kahapon sang udto.
Ang 19-anyos nga lalaki nga residente sang Barangay Lip-ac, San Enrique, Iloilo ang nadetain sadtong Setyembre 4,2020 bangud sa kaso nga homicide.
Sa interview sang Bombo Radyo Bacolod kay P/Major Anthony Grande, hepe sang Pulupandan Municipal Police Station, ginpahayag sini nga antes natabo ang insidente, gindul-ungan pa ini sang pagkaon sang iya utod.
Tunga lang sang pagkaon ang ginkaon sini.
Pagkatapos sadto suno sa hepe, nakita pa ini sang mga personnel nga naka-uba sang panapton kag nagayuhom-yuhom antes magsulod sa banyo.
Pagkatapos sang 15 tubtob 20 minutos, gintawag na ini sang pulis sang makatatlo ka bes apang wala nagasabat.
Didto na kag ila ginbuksan ang selda bangud nga nalipdan ang CR.
Nakit-an na lamang sang pulis nga nagabitay na ang biktima gamit ang iya nga bayo.
Gintinguhaan pa ini nga i-CPR sang isa ka police personnel apang napaslawan sila nga marecover.
Ginhingagaw pa sang kapulisan nga dal-on sa Bago District Hospital ang biktima apang gindeklarar nga dead-on-arrival.
Sa inisyal nga imbestigasyon, suno kay Grande, posible nga na-discourage ang biktima bangud nga nagahingyo ini sa iya pamilya nga ma-pyansahan.
Nahibaluan nga 40 mil pesos ang gina-rekomendar nga pyansa para sa temporaryo sini nga kahilwayan.
Dugang pa sang hepe nga posible napinsaran sang biktima nga ginapabay-an na siya sang iya nga pamilya.
