Gindagdagan sang Bacolod City Legal Office sang cease and desist order ang isa ka pribado nga kumpanya nga nagtukod sang riprap ukon pika pika sa sapa sa bahin sang Barangay Villamonte, Bacolod City.
Sa interview sang Bombo Radyo Bacolod kay Bacolod City Legal Officer Atty Karol Joseph Chiu, ginserbe nila ang CDO nga may kaupod nga restoration order kasunod sang mando ni Bacolod City Mayor Greg Gasataya.
Suno kay Chiu, ang ginkuha sang nasambit nga kumpanya amo ang fencing permit apang ang gin-ubra amo ang riprap ukon ang pika pika.
Suno diri, ang gin-ubra nga riprap ang naglab-ot sa creek nga nagresulta sa pagtunga sang nasambit nga sapa.
Natukiban nga may irregularidad sa pag-issue sang fencing permit bangud bisan gin-object ini sang Barangay ginpermahan gihapon ang permit kag nadayon ang pagtukod sang proyekto.
Suno sa Legal Officer gindefer man sang Barangay ang fencing permit nga gin-applyan sang mga ini bangud nakita sang Barangay Council nga kun butangan sang kudal wala na sang gwaan ang tubig kag delikado na sa mga pumuluyo sa tion nga mag-ulan.
Dugang pa ni Chiu wala dapat sang improvements nga himuon sa bahin sang creeks.
Una na nga nakita sang ciudad ang riprap sang tinalikdan nga sinemana bangud sa pag-audit sang mga creeks sa ciudad.
Ginpahayag man ni Chiu nga may dugang pa sila nga mga lugar nga serbehan sang cease and desist order.
