Bata pa lamang si Private First-Class John Rey Brasil handum na sini nga mangin isa ka suldado.
Si Brazil, nga katapo sang 79th Infantry Battalion sang Philippine Army ang napatay sa engkwentro batok sa Northern Negros Front sang New People’s Army sa Escalante City sang Hunyo 1.
Sa interview sang Bombo Radyo Bacolod kay Pablo Brasil, amay ni Private First-Class Brasil, wala naluyagan sang iya anak ang ginapigos gani lamharon pa lang handum na sini nga magsulod sa Philippine Army agud nga mapangapinan ang ginapigos.
Suno sa amay, si Brasil ang nagsulod sa serbisyo sang nagaedad palang ini sang 19 anyos.
Ang anak sini ang highschool graduate kag nagkuha sang vocational course sa Technical Education and Skills Development Authority (TESDA).
Ginpahayag man sang amay nga nabaton na sang ila pamilya ang natabo bangud nahangpan sang mga ini ang propesyon nga ginsudlan sang iya ila bata.
Ginlaragway man sang amay nga mabuot ang bata sini kag bisan gision pa ang bayo wala ini napangilala nga pobre ini kag ginapangamigo niya ini.
Napulo pa lang ini kaadlaw nga nakabalik sa trabaho bangud nagbakasyon ini sang 20 ka adlaw apang suno sa amay wala ini nakapauli sa ila sa Barangay Buluangan, Guimbal, Iloilo.
Si PFC Brasil ang isa pa lamang ka tuig nga ginkasal sa iya asawa nga residente sang Barangay Pandanon Silos, Murcia, Negros Occidental kag wala pa ang mga ini sang bata.
Suno sa amay nga Brasil, nakamuno man ang anak sini nga kun makabata siya sang lalaki indi niya ini pagpasugtan nga mangin suldado bangud nakahibalo ini kun ano ka budlay magsulod sa serbisyo.
