BACOLOD CITY – Ginahibalo pa sang Bureau of Fire Protection ang ginhalinan sang sunog sa isa ka Catholic high school sa banwa sang Binalbagan sa probinsya sang Negros Occidental.
Sa interview sang Bombo Radyo Bacolod kay FO3 Jonathan Bernardez sang Binalbagan Municipal Fire Station, ginpahayag sini nga ginlamon sang kalayo ang bilog nga 2-storey building sang San Blas Academy, Inc. sa Barangay Payao.
Ang nasambit nga school building ang ginalakipan sang 14 classrooms kag ginagamit sang mga estudyante sa nagkalain-lain nga year level.
Naabo naman tanan nga mga libro sa library sang private school sa ikaduha nga panalgan sang building.
Maswerte naman nga may yara sang fire wall ang computer room sa ground floor gani nga wala ini ginsulod sang kalayo.
Wala man nadalahig ang tupad sini nga mga school buildings kag ang simbahan.
Suno sa principal sang eskwelahan, nagadangat sa P11 milyon ang halit sang sunog.
Sunu kay Bermudez, nagbulig pa ang firetrucks sang Isabela kag Hinigaran apang wala sa gihapon napalong ang sunog bangud sa kadakuon sini kag human sa kahoy ang school building.
Nabaton sang Binalbagan Fire Station ang fire call alas-9:51 sang gab-i apang ginapahayag nga nagsugod ang sunog alas-9:20 na sang gab-i.
Padayon pa sa karon ang imbestigasyon sang fire station kun ano ang ginhalinan sang sunog apang ginalantaw naman ini nga electical in nature.
Photo credit to Binalbagan LDRRMO
