Ginpahayag ni Bacolod City Mayor Alfredo Benitez nga ginakonsiderar sang mga private investors ang pagtukod sang ‘Japan Town’ sa ciudad agud nga mapromote ang tourism.
Sa press conference matapos ang pag-upod ni Benitez sa working visit ni President Bongbong Marcos sa Japan sang tinalikdan nga semana, ginpahayag sini nga nangin fruitful ang trip sini sa Tokyo agud nga ipromote ang ciudad sang Bacolod.
Suno diri, laban sa marketing effort ang iya nga pag-upod sa presidente.
Suno sa alkalde, wala sang specific nga kontrata nga gintarget sa nasambit nga trip apang ginpresentar sang delegasyon ang pungsod para sa posible nga pagtukod sang mga proyekto sa ciudad sang Bacolod.
Si Alliance Global Group Inc. (AGI) Chief Executive Officer Kevin Tan, nga honorary mayor sang Bacolod City, ang nagpahayag man nga maga-allocate ini sang tatlo ka ektarya nga area sa The Upper East nga igadevelop agud mangin Japan Town sa Bacolod.
Suno kay Benitez, gina-finalize na ni Tan ang perspective kag design sang nasambit nga proyekto.
May yara man sang coordination sa Japanese Embassy agud nga mamaterialize ang proyekto kag gintulinan sini si Councilor Jason Villarosa, chairperson sang committee on tourism sa Sangguniang Panlungsod, nga magcommunicate sa Japan Embassy.
May pila naman ka mga investors sa patag sang renewable energy kag infrastructure projects nagikan sa Japan nga nagpabutyag man sang interest nga mag-invest sa Bacolod.
