Ginpangunahan sang Police Regional Office 6 ang paglunsyar sang “Kasimbayanan” ukon “Kupulungan ng inyong Pulis, ng inyong Sundalo, ng inyong Bantay Dagat, ng Comelec, at lahat ng Lingkod Bayan kasama ang Simbahan at Pamayanan” para sa Secure, Accurate, Free and Fair Elections (SAFE) 2022 sa PRO6 Grandstand, Camp General Martin Teofilo B. Delgado, Iloilo City sang Pebrero 18, 2022.
Sa interview sang Bombo Radyo kay PRO6 Spokesperson Police Lt. Col. Arnel Solis, ang seremonya ang ginpakigbahinan sang nagkalain-lain nga ahensya kaangay sang Philippine National Police, Philippine Coast Guard, Armed Forces of the Philippines, Commission on Election, Parish Pastoral Council for Responsible Voting Religious and Community Leaders, kag Religious kag Community Leaders nga may kaangay nga tinutuyo nga amu ang violence free kag peaceful electoral process.
Suno kay Solis, tinutuyo sang nasambit nga endeavor nga mapreserve kag maprotektahan ang integridad sang palaabuton nga May 9, 2022 National and Local Elections (NLE) paagi sa Interfaith Prayers.
Ini ang magaserbe man bilang venue agud matipon ang mga stakeholders para sa ila public declaration sang pledge of commitment kag collaborative effort para sa isa ka non-partisan kag non-violent election.
Ang nasambit nga aktibidad ang una naman nga ginlunsyar sa national level sang Pebrero 03, 2022 sa PNP Headquarters, Camp Brigadier General Rafael T. Crame sa Quezon City.
