Nagpahanumdom ang Police Regional Office 6 nga sundon ang guidelines sa pagpatuman sang checkpoint kadungan sa pag-umpisa sang election period sa Enero 12.
Sa interview sang Bombo Radyo Bacolod kay Police Regional Office 6 spokesperson Police Lt. Col. Arnel Solis, may mga guidelines nga dapat sundon sang mga pumuluyo kasubong man sang mga kapulisan sa pagpatigayon sang checkpoint.
Suno diri, dapat naka-uniform ang mga pulis; dapat well lighted ang area kun may checkpoint sa gab-i; kag plain serach view lamang ang iconduct apang kun luyag sang pulis nga lantawon ang sulod sang salakyan, dapat nga mangayo ini sang permission halin sa tag-iya sang salakyan.
Samtang, sa mga nagabyahe naman, dapat nga i-roll down ang bintina sang salakyan kag i-on ang cabin light kun yara sa checkpoint kag ipakita man ang lisensya kun kinahanglan.
Suno kay Solis, kun may makita nga armas-luthang, ini ang pangitaan sang exemption nga dokumento halin sa COMELEC.
Pahayag ni Solis, sigurohon man sang kapulisan nga indi makahalit sa traffic ang pagpatigayon sang checkpoint.
