Bukas ang Police Regional Office 6 sa pagsunod sa Philippine National Police (PNP) sa plano nga dagdagan sang lifetime ban ang sin-o man nga madakpan nga maglapas sa election gun ban.
Madumduman nga may natabo nga road rage sa Antipolo City nga nagresulta sa shooting incident sang Marso 30.
May nagluntad nga kinagamo sa tunga sang mga motorcycle riders kag 28 anyos nga driver sang salakyan.
Nagtinapongolay ang mga involved tubtob nga nagkuha sang armas-luthang ang driver sang salakyan kag nagpalupok.
Tatlo ang biktima sa pagpangluthang kalakip na ang live in partner sang driver sang salakyan nga nasalabat samtang ang isa nga biktima ang nagtaliwan pagkasunod nga adlaw.
Sa karun, plano sang PNP nga dagdagan sang lifetime ban sa pagbakal sang armas-luthang ang sin-o man nga magbayolar sa election gun ban.
Sa interview sang Bombo Radyo Bacolod kay PRO6 spokesperson Police Lt. Col. Arnel Solis, ini ang plano pa lamang kag maga-agi pa sa nagakadapat nga proseso.
Suno diri, kun ano man ang mangin resulta sang proposal, sila ang magasunod lamang sa mando sa ila.
Nagpasalig naman ini nga padayon ang ila pagconduct sang COMELEC checkpoint kasubong man sa pagpatuman sang COMELEC gun ban.
