Nagahulat pa ang Police Regional Office 6 sang guidelines nagikan sa higher command angot sa task force nga magatutok sa vote buying.
Madumduman nga nagtukod ang Commission on Elections sang Task Force Kontra Bigay nga ginalakipan sang poll body, Department of Justice, Armed Forces of the Philippines kag Philippine National Police kag mismo si Commissioner Aimee Ferolino ang gindesignate nga pinuno sang task force.
Suno kay PRO 6 spokesperson Police Lt. Col. Arnel Solis, wala pa napapanaog ang specific guuidelines angot sa task force nga magatutok sa pagbaklanay sang boto apang may layi man nga nagamandu sang citizens arrest kun sa diin sarang madakop ang isa ka indibidwal nga maaktuhan nga nagahimo sang krimen bisan wala sang warrant of arrest.
Nakahanda naman ang mga kapulisan sa Region 6 sa paghatag sang seguridad sa pag-abot sang ballot boxes kag iban pa nga election paraphernalia bangud magacoordinate man ang Comelec sa PNP kun kinahanglan ang bulig sang police officers.
31 dias nalang ang nabilin antes ang eleksyon sa Mayo 9 kag nagalaom si Solis nga mangin malinong kag matawhay ang piniliay.
Suno kay Solis, nakahanda na ang mga pulis nga maghatag sang seguridad sa eleksyon gani nagahingyo ini nga ipabilin ang kalinong bangud para man sa benepisyo sang tanan ang madinalag-on nga piniliay.
