Dako nga bulig para sa hanay sang kapulisan sang P553 million nga procurement sang Police assets nga sarang ipanagtag sa mga lower units.
Ini ang ginlakipan sang 20 units sang personnel carier, 299 units sang light motorcycle, 193 units sang light transport vehicle, 75 units sang single cab patrol jeep kag 155 ka mga light machine gun.
Sa interview sang Bombo Radyo Bacolod kay Police Regional Office 6 Spokesperson Police Lt Col. Arnel Solis, ginalantaw na sini nga sunod nga ipanagtag sa mga Regional Offices ang mga bag-o nga assets, apang wala pa mahibaluan kun ano nga gamit ang ihatag.
Paathag sini nga sa PRO 6, ginakulang gid gihapon sang mga salakyan nga ginagamit man sa crime prevention efforts, patrol unit, sa pagfile sang kaso, kag mga follow-up investigations kasubong man mga armas-luthang.
Tuigan naman ang pagbakal sang mga Police assets, kag ang ginabakal nga mga equipments ang nakabase man sa assessment kun ani ang ginakulang sa mga kapulisan kag kun may available nga pondo.
