Nagmandu ang regional director sang Police Regional Office 6 nga imbestigaran ang serye sang shooting incidents sa ciudad sang Bacolod.
Nahibaluan nga malapit na sa 10 ang numero sang shooting incidents sa ciudad humalin sang bulan sang Enero kag kalabanan sa mga ini ang kahimuan sang riding-in-tandem suspects.
Sa interview sang Bombo Radyo Bacolod kay PRO 6 spokesperson Police Lt. Col. Joem Malong, natalupangdan ni Brigadier General Rolando Miranda ang asud-asud nga pinatyanay sa ciudad gani ginmandu sini nga dapat imbestigaran ini sang maayo sang Bacolod City Police Office.
Sa ginpatigayon nga Enhanced Managing Police Operations, ginreview man ang performance sang mga police office.
Isa sa mga intervention amo ang pagpasangkad sang police visibility kag motorcycle cops agud nga sila ang makaresponde sa gilayon.
Suno kay Malong, motorsiklo ang kalabanan nga get-away vehicle sang mga suspetsado.
